mardi 1 juin 2010
لهنا، اللغز الكبير إلي عقدني هو الحلقوم . ديما موجود في الحوانت. قد ما شديت العسة لا عمري نهار ريت واحد م اللي عندهم حانوت يشري في الحلقوم ولا يهبط فيه . والحانوت ديما فيه بزايد حلقوم ، والعباد ديما تشري . نهار تشجعت وسألت واحد فيهم : "منين ها الحلقوم الكل ؟؟".. قالي : "ما ندريش ، هاوينو غادي ، وهاني نبيع فيه و أكهو .." ...
لهنا كل شي مختلف، عالم أخر ، مفاهيم أخرى . الصلاة مثلا . الناس الكل تصلي ... وقت إلي تواتي ! ووقت إلي ما فماش بيرة . وغير البيرة والشراب لحمر ما يعتبرو شي حرام . خالي ، مدب ، وشد إمام قبل ، مرة يحكي معايا ، قالي : "اخطاك م الشراب ، حرام ، ربي ما يحبوش ، عليك ب التكروري ، حلال محلل ".. كي شافني بهمت ، قالي : "والله ربي ما قال عليه شي .. صحيح الحاكم ما يحبوش ، مانعو و مسيب الشراب. أما ما تنساش ولدي ، لا كانو الحاكم مولى الحبس ، الجنة مولاها ربي ".. البيرة ولشراب لحمر حرام متاعنا احنا ، حرام عائلي
الكبار لهنا يقولو اللي كل شي بوقتو ، إذا كملت نحيت الزيتون وبعتو ، ولا عثرت وبعت ، تنجم تنده تشرب مرتاح ، سلكت ... سينون ، ماذابيك تصلي لوين تسلك . ولهنا ، في شيرة "العمايمية" (آل عمامي ) في المكناسي ، البيرة مكون روحي أساسي للهوية . ما فماش عمامي ما شربش . وجماعة البيرة ما عندهم حتى مشكلة .هو الحق ، الوديان لهنا ما تجي كان متع شراب وشيخة . لهنا كلمة "سوكارجي" ما فيها حتى حكم أخلاقي. هي وصف كيف غيرها م الأوصاف ، كيما تقول أسمر ولا طويل ولا بوهالي . الحاجة الوحيدة اللي ، من عمر معين ، ماذابيك تولي تشرب بالسرقة. لا محالة الناس الكل تبدا فيبالها، أما كي تجي تشرب ، قول إلي هو بالسرقة ، على خاطر عيب ، شايب ، بأولاد أولادك وتشرب .
لهنا برشة حاجات تضيع ، تذوب ، المناصب الاجتماعية ما تعني شي . نفس العيلة تلقى فيها طبيب وبطال وفلاح ورئيس جامعة في الخارج . وأولاد المكناسي ، مهما كبرو وطلع دولارهم ، أول ما يروحو للمكناسي لازم يعملو كيف غيرهم : يسقو الزيتون ويسرحو بالغنم . واحد حضرتلو ، مازال كي روح من كندا ، بعد ما نصبوه نائب رئيس جامعة في مونريال ، أول ما هبط م الكرهبة متاعو، وسلم على اهلو ، خرج ديراكت يسرح ، بالكسوة والهيلمان لكل، كيفو كيف غيرو.وعادي ، هذاك اللازم، هذاك حق المكناسي .
والناس لهنا معاييرها للإحترام ، ما تتبدلش بكرني شيكات. اللي يبدا حاجتو بكلب ، يمشيلو ويقول : "يا كلب ، هات "... ما يحشموش من بعضهم الحشمة الزايدة . كي يتعاركو على زرع ولا أرض ولا بير ، يحكيو مع بعضهم بالواضح : "إنت فكيت هذي ، وغرت على هاذي" "نا حاجتي بيها أكثر منك ، إنت ما عندك ما تا تعمل بيها" ، وديما أحباب ديما أصحاب ، يستحيل تلقى زوز م الناس قاطعين بعضهم على خاطر رزق ولا فلوس . بش زوز يوصلو يقطعو بعضهم ، لازم تكون حكاية فيها كرامة.
مفهوم الكرامة في المكناسي ، يمكن أصعب حاجة تنجم تعرضك في حياتك ... ما تنجمش تحصرو ولا تفهمو .. على خاطر نفس العبد ينجم يقبل كف ويتسخسخ ويعديها ، حتى قدام العباد ، وبينو بين روحو ... نفس الشخص ينجم يقاطع نفس العبد لوين يموت كان لزم على غزرة ولا تفدليكة .. كيما ساعات ، عركات كبار ، متع سنين ورا سنين ، تتحل بالصدفة ، وسلام ع الطاير.
نسا المكناسي كيف كيف ، حالة خاصة . ما تنجمش تحكي ع المساواة ولا غيرو في المكناسي ، على خاطر تلقى روحك "أور سوجي". النسا لهنا ، ماهمش أشخاص ، هوما شخصيات . كل مرا تلقاها عندها وزن كبير، كل مرا عندها إسم وشهرة وموجودة في كل شي : الفلاحة العروسات العرك التجارة .في محافل المكناسي وعيشة كل نهار. فاطمة الالمانية ، الحادة، مباركة بنت الحاج الصادق، فاطمة بنت الزاكي .. كل وحدة بحكاياتها وبطلعاتها وبمواقفها ... شهيبة، الله يرحمها ، عذراء الريف ، وسطهم الكل، على شيرة ... شهيبة توفت مالهاش ياسر ، وعمرها 86 سنة ، حبت على واحد ، و مات قبل ما يعرسو، حلفت لا تعرس بغيرو .. للي توفت ، والتلايلية (فرع م العمايمية) يشاوروها في كل شي، كونها ما عرستش ، ما سببلها حتى قلق، وحد ما ناقشها في قرارها ولا عايرها نهار. كان مجرد تفصيل ما عندو حتى أهمية ... في المكناسي، ما فماش لغة "يحكي مع الراجل" كيف تبدا حكاية تعني مرا ... ديراكت لحديث مع المرا يصير، في أمور رزق ولا فلاحة ... مش عيلة مش زوز، فيها نسا واقفين حديد ، يتحسبلهم 20 ألف حساب ... كل واحد مسؤليتو مستقلة على غيرو. كيف الناس لهنا تبدا تخطط ولا تحكي ولا تفعل، عمرهم ما يحطو هذيكة مرا وهذاك راجل. حتى كي ينسبو، يقولو "ولد فلانة " و "ولد فلان " كيف كيف ، ماهيش سبة .
لهنا ، الناس الكل تكره الحاكم . الناس الكل تسب فيه. حتى م العمدة [بوبكر الأول و بوبكر الثاني] وجموع الشعبة. واحد معروف غادي ، تابع الحزب ، كان ديما ما يفلت حتى فرصة بش يهنتل المعتمد والوالي وأي مسؤول يطيح بيه. السيد هذا ما فماش مؤتمر متع الحزب ما شاركش فيه ، وقدم لايحة إنتخابية فيها هو برك . تشيخلو كي يبدا في المؤتمر يسب وينعل ، يمشي لعباد واصلة بالذمة ، يجبد واحد : "إنت فلان ؟؟" "أيه تفضل " "ما أسقطك ، والله لا تجي راجل ، كذاب ، تخدم لروحك ... وين ... وين ..." وينده ، ينحيلو جد امو الكلبة . السيد هذا ، إخترع كلمة سبيسيال لجموع الحاكم (إلي كان لأخر لحظة في عمرو معاهم )، إلي هي "تفسخة" ... ال"ت" ، هي صيغة المستقبل في لهجة المكناسي ، والكلمة معناها :" مشروع عبد بش يولي فسخة " ، فسخة لمشتقة من "فسخ".
لهنا في المكناسي برشة حاجات تنتفي ، يولي ما عندها حتى معنى ، كيف التفاؤل والتشاؤم . ديجا ولد المدينة عديم الخبرة ديراكت يولي يخمم إلي في ها البلاصة ما فماش مستقبل . وكي يجي يتبع لوجيك العباد إلي لهنا ، يخج ، ويبهم إلي حد ما يجبد ع المستقبل إلي ما فماش . وقد ما يقعد يخمم ما يفهمش . وببهامة يقول إلي الناس ما عندهاش وعي . بينما كان تجبد ع الموضوع لأي واحد ، توة يستغرب أصلاً من فكرة المستقبل فما ولا ما فماش . وهذي روعة المكناسي . إلي هذا يقلك : " حتى نخلط ع الحاضر قبل، نشوفو فما ولا ما فماش " كانك ع الماضي ، لقاولو حل جذري . سمو عايلات بأسامي تشبه الدول الإسلامية . عندك مثلاً العبابسة ، ع الدولة العباسية ، والحساينية ، ع الدولة الحسينية ، والعثامنة ، ع الدولة العثمانية ، والحوامدية ، ع الدولة المحمدية. والباقين إبتكرو لرواحهم دول . على خاطر الماضي ، في المكناسي ، ما يعني شي . لعبة يعديو بيها الوقت كيف يرقد العايش. وم الحاجات إلي نموت عليها لهنا ، إلي عمرك ما تسمع الحنينيات متع وذني : "قبل يا حسرة ، كنا ... قبل كانو ... يا حسرة يا زمان ..." هذي جمل إستحالة تسمعها لهنا على خاطر المكناسي كيما قبل كيما توة ، الدنيا دايرة بالغالط ، ومازلنا نفركسو كيفاش نصلحوها
المكناسي ، برشة يعرفوها محطة متع ترينو قفصة ... بلاصة غير عادية ، هاربة من زمان أخر ، وديان في كل شيرة ، خدودهم يبكيو بالزين ... الريزو لهنا شلطة وحدة ، مرة تطلع ، مرة تهبط .. قد ما حاولت نقنع لعباد إلي فما 5 شلطات ، حد ما حب يصدقني . قول ما عندهم ما يزمرو بيه الريزو ، إلي حاجتو بصاحبو يمشيلو طول ، ولا يناديلو من ورا الواد .
الدنيا لهنا ماخذا ريتم طايح بالنسبة لواحد عايش مصروع في المدينة . لهنا عندك الوقت لكل شي . كل شي . عندك الوقت الكافي بش ما تعمل حتى شي ، على راحتك . ديجا واحد م الناس ، عديت وقتي الكل نمارس في هاك النشاط السحري : حتى شي ، نيات ، نادا، الصحراء السيبيرية . وكونك ما تعمل في شي فن ، مش إلي يجي يقدر عليه . رمشة تخمام لا . ال"حتى شي " المتعودين عليه في المدينة طلع فالصو . في المدينة ، ما تعمل في شي معناها تتفرج في التلفزة ، تسمع في حس الكراهب ولا الجيران ، تدرجح فيهم (الكرارز بالنسبة للولاد والبزازل للبنات )، تمخور في خشمك ... معناها تعمل في حاجة معندهاش معنى . أما في المكناسي ... هييهييه ، تكتشف إلي هذاك لعب ذري متع قننوات الياغرط. لهنا ما تعمل في شي معناها بالرسمي ما تعمل في شي ، الفرق الوحيد بينك وبين الميت : هو يبكو عليه وإنت لا . في حانوت الضفافلية، كل نهار يعملو مسابقة متع "حتى شي "، وإلي يخمم شوية يخرج على برى . بطل المكناسي في الحكاية هذي هو "العايش". العايش هذا عندو استاذية في الفلسفة ، ومن هاك النوع متع العباد إلي كي تجي تحكي عليه ، ما تعرفش أنا كلمة تستعمل : راجل ، طفل ولا حاج. كي تشوفو ما تنجمش تعطيه عمر ، ولا حتى "فورشات". العايش هذا على ما قرى وتبع الكتب والخربقة والتاي لحمر بالشب ، مخو فرغ مسكين . الذبانة تدخل من وذن ،تقعمز في الراس ، تلعب طرح شكبة وتخرج م الوذن الأخرى ، من غير ما يعرضها شي ؛ العايش يعديلك أكثر من 12 ساعة دون إنقطاع ما يعمل في شي . الحاجة الوحيدة إلي خلتو ما يخلطش ال-24 ساعة ، هو إلي ساقو تتنفخ ولازمو يتحرك يبدل البوزيسيون . والعايش كي يبدا مع صحابو ، ما يعمل في شي ، يشم ريحة التخمام كان بدا يجي لواحد . يولي يرمي كلمة ستيل : "الوجود ، قازوز ، الثورة ، الحق، بطانية زرقة ، مرمز بالدجاج " مخاخ الناس الكل تمركي ستوب وترجع تخمد.
الحاصل حاجة روعة ، تخليك تكتشف أهمية كل شي مهما كان صغير ، عينيك يتحلو على حاجات عمرك ما لحظتهم قبل . كي تتعدى بحذاك نمالة ما تشلقش بروحك كيفاش تقول "ياااا !! نمالة !!!" وتقعد تعاود فيها لوين تغيب عليك وتقول :"ياا !!! بح نمالة مشت !" .. حتى م الطقس يساعد : شمس زارقة تشوي والبرد يضرب في العظم. النهار الاول ، مشى في بالي المكناسي تخلقت في قالب كاميرا خفية ...
لهنا ، الحاجة الوحيدة إلي تدل إلي فما حضارة في بلاصة م البلايص هي كرهبة كات كات باشي تتعدى كل نهار إثنين مع العشرة متع الصباح لحانوت "الكربة"، تفرغ شكاير سميد وخمسين خبزة وياغرط. الخبز يتباع على جمعة كاملة . أما الياغرط، هذيكا حكاية أخرى ، عالم مستقل بذاتو . شو ، شو ، تعرف كيفاش ؟؟؟ ريتش أنواع الياغرط المعروفين الكل ؟؟لوحهم الكل ورا ظهرك (رد بالك على حوايجك ) وأبدا إستنبط أسامي أخرى م الخلا، نضمنلك 90% منهم تلقاهم في حانوت الكربة ، ياغرط "عزيز" و-"اوتا" و-"أوخي" و-"النسيم" .. زيد أعمل مجهود وتفكر الانواع إلي ماعادش موجودين : ستيل بالدقلة ، يوغو ، صندي، زياد .. حتى من باكوات رايب مثلث تلقى ... خلي م البشكوتو ، أسامي فروخ الروضة لكل تلقاهم : بسكوي "أمير " و-"ميرنا" و-"حمدي " ...
المكناسي بالحق عالم أخر . الناس الكل بتلافزها ، والتلافز الكل ما يمشوش. الاشوم ، إلي تسألوا : "شبيها ما تمشيش التلفزة " يجاوبك طول : "م الندى" ... يزيد ربع ساعة يشكيلك م الجفاف والمطر إلي مش حابة تصب ... مخك يتكونسى . ترجع تسأل : "مالا الندى منين ؟؟" يقلك طول : "أما ندى ؟؟؟ أخا ضبعت ها طفل ؟؟" ... إلي هذا عندو بارابول نومريك وقصعة مصددة. كي تسأل واحد : "اش تندب بيه ؟؟" من غير ما يبطا يقلك طول : "حتى شي" .."امالا لواه ماخذو ؟؟؟"..."ما ندريش ، هاوينو غادي .. قلقك ؟؟ تحب تشري ؟؟" .. ال"حتى شي " لهنا فلسفة في الحياة ، رؤية كاملة للوجود والعدم .. كل شي لهنا يتجرد من كل شي ، ويرجع لمعناه لولاني البسيط : " لاش ينفع ؟؟؟ كانو ما ينفع لشي ، خليه ، اشريه ، اسرقو ، فكو ... أماكانذا اخطاك ، تعب ووجيعة راس وهم أزرق زايد "
الناس في المكناسي عندهم حكمة خاصة وطريقة غريبة في التعامل قايمة على حاجتين : السخرية والتخرنين. التخرنين لهنا من أجل متعة التخرنين . فن من أجل الفن . خالي عندي يجي 10 سنين ما قابلتوش ، أول ما شافني نقز ، وطول بدا يخرنن على عزرائيل إلي هز ما هز م الارواح ، وخلاه هو واحل مع مرتو وصغارو .. تعدى مبعد خرننلي عليهم واحد واحد (عندو 12) ، بعدها خرنن ع الزيتون ، وبعد ما خرنن علي أنا إلي ما نطلش ، قالي : "إيه ، و شنهي حوالك، لاباس؟؟ " ... غلط وقتلو :"الحمدله ، لاباس" ... وعينك ما تشوف إلا النور ، طلع السيد كان جوست يسخن ، وأنا بهاك الكلمة عطيتو إشارة الإنطلاق ... "صحة ليك ، صغير مازالت الدنيا قدامك .. مناش عندك بش تشكي ؟؟ ... مش كي إلي عمرو فات عليه ، القاعد أقل م إلي تعدى ، حتى لو كان جا ..." 6 سوايع كاملة يا بوقلب ، تحط الفطور وتهز ، وسربتلنا "حدة" 15 كاس تاي أحمر ، وفيصل ولد خالي طرشق 10 كعبات بيرة تحت حيط الدار ، وخالي يخرنن ... وأخيراً سكت وقالي :" أما الحمد لله على كل حال" وقام ... جاني فيصل يجري قلي "قطع ، راهو بش يصلي ويرجع يكمل .." ... خرجت نجري كيف السارق ...
فيصل هذا ولد خالي ، مكناسي أصيل ، يضرب مبعد يسأل : "شفمة ؟؟ شني لحكاية ؟؟" ... يحكيلك عادي للصباح ع الميزيرية والتمرميد والظروف ، كان يشلق بيك تعاطفت معاه ، يقولك "جيتك نطلب ولا سارح عند جد بوك الكلب" ... نهار جبدتلو على 26-26 ، بش نسأل عملوش مشاريع في المكناسي ، قلي : "إيه نسمعوا بها ، كل عام نتبرع ... قالو للفقرة والبلايص الريفية ... يعطيهم الصحة " ...
يا أيها الشعب الخايف، يا بو أحلى شفايف،
القمة القمة القمـــــــــــــــــــــة
يا محلا جو القمة
مع العيلة تحلا اللمة
و العيشة تولي عسل
مع الثمانية تبدا النشرة
و الضحك الكل و الجو
كاكاوية و تاي و سهرة
مع بيانات الآي آو
من حيث، و يبدو أن
غير أني الآن أرى
و كي تجي تشوف العيب موش منا
أما الله غالب، الشعب خرا
يحلا الجو و تحلى الشيخة
مع القذافي و الكعبات
"خنزير، يا عميل البطيخة"
غير شوف فلوسو وين تبات
و التحاليل الثورية
على أصل المشكل و الحل
يا جماعة : الديمقراطية
... و البوليس هو الحل
و يطلع عمك بشار
وراه الخبرة العائلية
" طهار en tant que ex"- شوفوا ، أنا
رايي : الشعب ليه المدفعية"
و ساعات يركح الضرب
مشطة و بونية و أناناس
و الخلاف : شكون اللي بدا الحرب
في جزر البهاماس
صحيح البهاماس ماهيش عربية
أما القذافي يقول
كيف تركز و تنف شوية
تلقا البهيم و العربي، نفس الأصول
و العز الكل ، يا عشيري
كيف أبو مازن يتكلم
"أمان كيفاش ندبر شهريتي
يا ولادي، نحب نتعلم.."
يغمز عاهر الحرمين
"انت فاوض واش عليك
و ما تنطقش بفلسطين
توا صواردك الكل تجيك"
و تبدا الجلسة المغلوقة
جلسة كلها ألغاز
"زعمة الترمة، خليقة مشقوقة
"Juste effet mta3 gaz ولا
و نهارة الل توفى الاجتماعات
ع الشعوب اللي بايتة تحلم
بالقرارات الحربية
و القوة العربية
تطلع أحلى قرارات
كلها رباية و فيناس
ذات الصبغة التنديدية
"عيب عليك يا ولد الناس
أمان أمريكيا، هكا تعمل فينا؟؟
و احنا اللي على خاطرك اتلمينا؟؟
ممالا شوف الاستنكارات"
... و القرودة الكل تروح
تطرطر فرحانة و تضحك
عملت أقصى ما تقدر ..
هانا نددنا، من فضلك...
تحيا القمة العربية
و يحيا الضحك اللي بوبلاش
و تحيا الحكمة القيادية
من عند قرودة ما تسواش القمة، القمة، القمة
بيان على خلفية الأحداث الأخيرة ، و نظراً للتعنت الذي لقيناه، ولامبالاة السلط المعنية، وبعد أن انغلقت كل السبل امامنا، نعلن عن دخولنا في إضراب مفتوح عن الجوع ، إلى أن يتم تحقيق مطالبنا العادلة و المشروعة. ونلتزم أمام الرأي العام بتناول ما تيسر من الطعام كل ساعة تمرن دون تحقيق مطالبنا. هذا وقد بدأ تحركنا الإحتجاجي يوم 20/04/2009 على الساعة 12 ظهرا ، بكسكروت غوتة وجبن مالح ، في 8 نهج غانا ، حلايبي الحاج، تناوله المدعو عزيز عمامي ، و صحن كفتاجي مقصوص عند رضا راس العظمة، 12 نهج جان جوراس حذو الميكانيسيان ، مرفوقاً بصحن بطاطا مقلية مشفوعة بقرنين فلفل بر عبيد، تناوله المدعو بيرم كيلاني. إن مكتبنا السياسي، ووعياً منه بخطورة المرحلة يعلن عن تشبثه ومساندته اللامشروطة ويهيب بجميع الأطراف في الساحة أن تهب هبة رجل واحد، ذلك أن الأمر يتعدى الأطراف والخلافات، و العلاقة الجدلية بينهما، ليمس الموضوع في جوهره الإنساني. وقد أعلن المدعي مطاع أمين الواعر عن التحاقه بهذا التحرك الإحتجاجي في ظرف 72 ساعة في صورة عدم تحقيق المطالب المذكورة أعلاه، بالتهامه،وحده، صحفة لبلابي صغيرة كاملة (عظمة و كأس) عند الحطاب الكائن ب 3 نهج غانا. ختاماً، نؤكد على تشبثنا بمواقفنا المعهودة وإن كان الموت نصيبنا لن ترهبونا عن الجوع، التخمة ولا الخضوع عاشت الحركة المعنية في صحة جيدة
عزيز عمامي بيرم كيلاني
بمساهمة :
Cactus Production
عزيز عمامي بيرم كيلاني
بمساهمة :
Cactus Production
تخيل لو كان نهار ، هكة ، ندرا اش يصير، و يخلط قرار محرقص لجموع تونس شبعة، باللي الكلام المرزي ما عادش مرزي ... تولي الفيراج متاع الكليب و ليسبيرانس و ليتوال يغنيو "تونس سبعة عشرة ملاين حبيناها..' ... تكون ثورة في الشكل تبدل وجه الدنيا ... الللي يحب يكفر يكفر و اللي يحب يسب يسب ... الحاصل ، عالم اخر ... هاو البروقرام :
- أخبار الثمانية :
* ... الجزء الأول كلو تربريب و تصاور من غير كلام ...
* أخبار دولية :
صرح رئيس وزراء إيطاليا ، المي*ون برلسكوني أنه ك*ز من الحراقة ... هذا و قد قال محلل سياسي أنه يخرالهم فيه
هذا و قد زادت تـــ*ــاكت الأمور بين حركتي فتح و حماس، حيث عبر الرئيس أبو مازن عن امتعاضه مما سماه "تقو*ـيب حماس" كما وصف الناطق الرسمي، مطاع أمين الواعر متاع حماس ، تصريحات أبو مازن ب "لعب الذري" ...
في أول رد فعل لها على تنديدات الجمعية العامة للأمم المتحدة، عبرت اسرائيل عن رغبتها في بعث المجتمع الدولي ينـــ*ــك
* أخبار وطنية :
أحرزت المفاوضات الإجتماعية القايمة منذ أيام سيدنا نوح على تقدم كبير، حيث عبر الأعراف عن استعدادهم اعطاء العصــ*ــة للشغالين، و قد قابلت المركزية النقابية هذا القرار بكثير من الإرتياح،
بعث المشاركون في الندوة الوطنية للبلغم و تكسير الجلغ برقية شكر و تهنئة إلى شسمو مناشدينه الترشح و الفك عن ر* والديهم
* رياضة :
نا* الترجي مرة أخرى البطولة الوطنية ،عن جدارة
بعد ثلاث أيام من درجحة الكرا*ز عاد ممثلو الرياضة التونسية من الألعاب الأولمبية
ولا تخيل الملف التلفزي، فما مسهول حاضر و الجموع عملو ريبورتاج مع مواطن حاجتو بالمسهول.
المواطن : و الله نا ماذا بي نقول لها المسهول هضايا، متاع ز*ـي، وين ر*ـك ها سي الخرا ... الخبزة غلت و الواحد ترمــ*و لهبت، ت*ــاك و ماهوش لاحق على ز*ـور ام فرنك احمر ... والله شحنا
ترجع الكاميرا للبلاتو ، و يجاوب المسهول بابتسامة جمهورية على محياه : " والله انا ماذابي الساعة قبل كل شي نقول لهالخرا متاع نـ*ـي اللي عديتوه توة اللي مانيش بش نعديهالو ، هذا أولا ، أما ثانيا ، نقلو اللي أمو القـ*ـبة تنا*ـــت سايي ، خلي يعرف رب الط*ـين كيفاه، ثالثا ماذابي نشير اللي هالموبـ*ـة هاذم قد ما تعمل معاهم و شي، جبنالهم المي جبنالهم الضو جبنالهم الكياس، و رغم ذلك مازالو يحلو في جلغهم، نعن دين ام هاالزنوس، الماركة الكلبة، رابعا نذكر اللي القاصي و الداني يعرف اللي أمورنا في تونس ستة زيت ، و كيما يقول المثل ، بالأمن و الأمان ترجي يا فنان ، عنا زينو ، و حا*ـينو ع العالم الكل في بلاد الفرح الدائم"
هوني المعارض دوزييم مان* متاع الح.د.س ** اللي مستدعينو للحلقة يقول : "و الله كي تجي تشوف.."
يهزو و يحطو المسهول ، و يقص عليه :" تي برة نـ*ـك امك"
يسكت متاع ال ح.د.س و يرسم ابتسامة استيطيقية على محياه، و يتدخل المنشط : "اقعد عـ*ـبة، سيدي المسهول حضرات النظارة، نأتي الآن إلى نهاية هذه الحلقة. إلى اللقاء في الموعد القادم، تصبحون على خير، و نـ*ـك امها"
...................................
........................
نـ*ـك امها
:)
* deuxieme main , men jmou3 koll el2a7zeb el9anouniyya
** : ح.د.س حركة الديمقراطيين السكوتيين
أمام تواصل التعنت الغير مسبوق ، و تصعيد لهجة التحدي والقمع من قبل السلطة و مواصلة لسياستها القمعية، والمستهدفه للحركة ،قامت السلطات مرةً أخرى. و مواصلةً لنهجنا النضالي اللذي عرفنا به في الحركة المعنية ، فقد قررنا ، مرة أخرى التصدي لمثل هذه الممارسات العنجهية الهجينة فقد قررنا خوض غمار المعركة لا يقودنا إلا احساسنا بالأهمية البالغة، وقناعتنا المترسخة بالمبادئ والقيم. إن السلطات ما فتئت تتحرش وتعتدي على كل نفس حر. فقد قامت مؤخرا بإنقاص 3 دقائق كاملة من الفسحة (ما يعبر عنه ب ركرياسيون) ، كما قامت بمنع ري الورود في جنينة الباساج. بل و بلغ التعنت حداً خطيراً ، بارتكاب مظلمة تاريخية بافتكاكها` لأحمر شفاه السيدة الفاضلة سرور بن سبادرين* ، اثر عودة هذه الأخيرة من نيو يورك، أين كانت تدافع على قضايا و هموم الشعب الكادح بكل ما أوتيت من قوة وشفاه. كما قامت بمصادرة مجموعة الغاز ثمينة (سلسلة رجل المستحيل) كانت بحوزة السيد نعمان الشوغافي** حين عودته من القاهرة أين كان يدافع على هموم و قضايا الشعب الكادح، بل والأدهى ، أنها ، نفس هذه السلطات القامعة القمعية، قامت بإفتكاك حبل غسيل المناضل خميس الخناري*** لإستعماله دون وجه حق(بكاء يرجى قراءة هذا المقطع مرفقاً بأغنية "دايماً دموع" لصاحبها هاني شاكر، تسجيل افريكا كاسات).
اننا وبعد ان انسّدت امامنا كلّ السّبل، وحيث لم يبقى لنا اي طريقة اخرى للتعبير غير اجسادنا ،نعلن، عن دخولنا
في اضراب مفتوح عن الطعام، الى ان تتمّ تحقيق المطالب المذكورة اعلاه (بكاء + تصفيق). و نعلن عن استعدادنا التام لشن الإضراب بأجساد غيرنا من المواطنين البررة. و نحن ندعو المجلس الوطني الأعلى لإنتاج وإعادة إنتاج إضراب الجوع، للإعتراف بنا من هذه اللحظة الصفر. يا احرار هذا الوطن. ان مساندتكم اللامشروطة لاضرابنا هي واجب على كل نفس حرّ، وكل من تتسنّى له نفسه ولا يسندنا ، فهو يدخل في متاهات مخططات السلطة(المخطط العاشر بالاخصّ). سنواصل النضال والبكاء...سنبكي نبكي نبكي، الى ان تجرف انهار دموعنا كراسي جلاّدينا. سنبكي الى ان يأتي الربيع، وتتفح الازهار.
دمتم للنضال، و دام هو كذلك.
هذا البيان بمساهمة توپ
مع تحيّات المجلس الاعلى لتمنية اضرابات الجوع
. إلى اللقاء في إضراب قادم.
پس: الى الرفيقة زينه القصرينية، التي تتعرض لحملة قمعيّ من لدن النظام الفاشي، لا تحزني سيأتي يوم و
نغني معا دنصي دنصي ندصي
azyz amamy et bayrem kilani
Inscription à :
Articles (Atom)
